Permet, Vendet kulturore dhe fetare
KISHA E SHËN MËRISË, FSHATI BËNJË
Është një ndërtesë në formë drejtkëndëshi me mure guri ndërsa çatia mbulohet me pllaka të holla të gurta. Ikonostasi është punuar në vitin 1904 nga mjeshtri Sionidhis Qioni. Kisha, e ndarë në dy ambiente reflekton ndarjen karakteristike midis burrave dhe grave përsa i përket shërbesave fetare. Në sallën e burrave ndodhet kupola në të cilën është pikturuar me ngjyra të ndezura figura e Jezu Krishtit. Në krye të sallës së madhe ndodhet ajodhima (vëndi ku prifti kryen shërbesat fetare dhe jepet kungimi e anaphora) ndërsa në krahun e djathtë është vendosur ikona (konizma) e Shën Marisë së Bënjës e veshur me argjënd nga Pandeli Saqellari. Aty ndër të tjera ndodhet edhe kazani i pakëzimit dhe vëndi ku qëndron dhespoti. Salla e grave është më e vogël, por me dy kate, i pari i shtruar me pllaka guri ndërsa i dyti si dyshemeja dhe shkallët i ka prej dërrase druri. Kjo kishë është e rrethuar nga qiparisa dhe me pamje mbi luginë.